Wyoming-en bizi den bertsolari gorritiarra 2024-10-16

Martin Goikoetxea bertsolariari omenaldia Gorritin

Martin Goikoetxea EEBBtako Wyoming-en bizi den bertsolari gorritiarrak bere sorterriaren omenaldia jasoko du larunbatean, Gorritiko Kontzejuak antolatuta. Martin Goikoetxea bera ez ezik, Maddalen Arzallus, Sebastian Lizaso, Aitor Mendiluze ariko dira bertsotan.

1966ko Nafarroako Bertso Txapelketan parte hartzen ari zela joan zen Ameriketara Goikoetxea, 16 urterekin. Gazte-gazterik hasia zen bertsotan eta ume kozkorretan Lazkao-Txiki Joxe Agirrerekin aritu zen herriko jaietan eta inguruko herrietan.

Bertsoa ez zen inoiz itzali Goikoetxearen barruan eta 1991eko Nevadako Gardnervilleko Bertsolari eta Kantari Egunean parte hartu zuen. Hamaika saio egin ditu Nevadan, Kalifornian, Idahon, Wyoming-en... besteak beste San Francisco, Elko, Chino, Boise, Rock Springs, Buffalo, Los Banos, Bakersfield, Reno, eta abarren. Bideo-konferentzia bidez Euskal Herriko bertsolariekin batera aritu izan da kontinente arteko aldibereko lehenengo bertso-saioan, 1998ko ikastolen aldeko Kilometroak ekitaldian.

2017an Euskal Herrian kantatu zuen, Bertsozale Elkarteak antolatutako saioan: Goikoetxea, Kurutxet, Lujanbio eta Egañarekin batean.