Larunbatean 21:00etan ETB1n 2024-11-21

Hitzetik Hortzera Gipuzkoako Txapelketan eta zahar etxetako bertso saioen proiektuan

Zahar Egoitzetan bertso saioak egiteko proiektuak 10 urte bete ditu. Adin Adin zenak, Bertso Bira izena hartu du aurten eta 30 bertso ekitaldi egin dira Gipuzkoako zahar etxeetan, Gipuzkoako Foru Aldundia eta Lankuren eskutik. Egitasmoaren helburua bertsolaritzaren bidez adineko pertsonen bizi-kalitatea hobetzea eta gaitasun kognitiboak sustatzea da. Hitzetik Hortzera Azpeitiko San Martin egoitzan izan da, ekimena bertatik bertara ezagutzeko.



Ekimenaren protagonista desberdinak elkarrizketatuko dituzte. Batetik Marian Mangas, Azpeitiko San Martin adinekoen egoitzako psikologoarekin elkartuko dira. Bertso birak, euren etxean sortzen duen giroz eta ekimenak berak dituen abantailez arituko da.

Joxe Mari Olaso San Martin egoitzako egoiliarrarekin ere elkartuko dira. Bertsozalea da eta gustora hartzen du bertsolarien urteroko bisita.



Juan Joxe Eizmendi Loidisaletxe eta Julene Iturbe bertsolariekin ere hitz egingo du Mirari Martiarenak. Bi bertsolariek hainbat urtetan kantatu dute Bertso Bira ekimenean elkarrekin eta orain arteko esperientziari buruz hitz egingo dute.

Bertso Bira eta Gipuzkoako Bertsolari Txapelketa

Hitzetik Hortzeran Azpeitiako San Martin adinekoen egoitzako Bertso birako bertsoaldiak entzuteko aukera izango da. Juan Joxe Eizmendi Loidisaletxe eta Julene Iturbe aritu ziren kantuan.

Gipuzkoako Bertsolari Txapelketa finalaurrekoetan sartu da eta Oiartzunen jokatutako saioko bertsoaldiak eskainiko dituzte larunbat gauean. Elorsoro kiroldegian Ane Labaka, Asier Azpiroz, Beñat Gaztelumendi, Eli Pagola, Nerea Elustondo eta Oier Etxeberriak egin zuten bertsotan. Ane Ezenarrok egin zituen gai-jartzaile lanak.



Hitzetik Hortzera, larunbatean 21:00etan ETB1en.