Lesakan, urtarrilaren 25ean 2024-12-26

Bertso Egunerako sarrerak eskuragarri

Bertso Eguna izango da urtarrileko bertso eskaintza nagusietako bat. Egun osoko eskaintza prestatu dute Bertsozale Elkarteak eta Bortzirietako Bertso Eskolak elkarrekin eta eskuragarri daude arratsaldeko ekitaldiko zein afaritarako sarrerak.

10:00etan izango da biltzeko hitzordua: Oinak Bidean ibilbidea egingo da Harriondoatik hasita: Lesakako bertsolaritzaren historiaren ibilbidea da, erreferentziazko puntuetatik barrena. Ondoren, bertso-poteoa egongo da eta hainbat bertso eskolatako kideek kantatuko dute. Eguerdian luntxa egingo da Arranon, 14:30etik aurrera.

XXI mende, 25 (H)illbetz jaialdia arratsaldean
Arratsaldeko jaialdian bertso gehiago entzuteko aukera izango da: XXI mende, 25 (H)illbetz bertso saioa izango da Harriondoan. Kantuan, Alaia Martin Etxebeste, Amets Arzallus Antia, Julio Soto Ezkurdia, Maddi Ane Txoperena Iribarren, Nerea Ibarzabal Salegi eta Peru Abarrategi Sarrionandia ariko dira; gai-jartzaile lanetan, berriz, Alaitz Rekondo Ferrero.

Saio ostean ere izango da festa giroa. 20:30etik aurrera, afaria egongo da sagardotegian. Eta afalostean, Manex Pagola eta Hor gu-ren bertso jarriak izango dira. Eguna biribiltzeko, DJ-a egongo da Arranon.

Arratsaldeko ekitaldirako zein afarirako sarrerak eskuragai daude bertsosarrerak.eus atarian. Ekitaldiko sarrerak 12 euro balio du, Bertsozale Elkarteko bazkideentzako 10 euro eta gazteentzako 8 euro; afaria, berriz, 36 eurokoa izango da.

Lesakan asteburu pasa egin nahi izanez gero, udalaren webgunean dago inguruan ostatu hartzeko lekuen zerrenda. Hementxe topa ditzakezue.