Mixel Xalbadorren heriotza 2025-01-15

"Gu hemen izanen gira / zuek hor bazirezte"

Mixel Aire Etxebarrenek 2008an Luhuson kantatu zuen bertsoak erakusten du urepeldarraren bertsolaritzarekiko eta transmisioarekiko ardura eta konpromisioa. Testuinguruan kokatzeko, Mixelek 90. hamarkadan utzi zuen txapelketa, ordurako besteak beste Nafarroako hiru txapel irabazita. 2008an Xilaba Iparraldeko Txapelketa jaio zen, Bertsularien Lagunak elkartearen eskutik, proiektuari bultzada berria emateko. Mixel Xalbadorrek, 64 urterekin, oholtzan eta bertsotan eman zien bere babesa belaunaldi berriei eta proiektu berriari. Luhusoko finalaurrekoan kantatu zuen Mixelek eta azken agurrean, ozen, Gu hemen izanen gira / zuek hor bazirezte bota zuen, Iparraldean bertsolaritzaren garai berri bat iragarriz. Txalotza eragin zuen agurrak.

Zer garrantzia ote da
galtze edo irabazte
iduritzen zaut gaur giro
berri bat dela haste
Bertsularitza ikusi
dugu guk heinbat triste
Baina tristura guztiak
gaur urruti zoazte
zer zoriona den zuek
eta gu hor nahaste
Gu hemen izanen gira
zuek hor bazirezte

Mixel Xalbador
Luhuso, 2008, Xilabako lehenengo edizioko finalaurrekoan.