Otsailaren 10 bitartean egin behar dute eskaera 2025-01-20

Bertsozale Elkarteko bazkideek 'Bapatean 2024' doan eskuratzeko aukera dute

Erredakzioa

Bapatean bildumaren 2024ko edizioa doan eskuratzeko aukera dute Bertsozale Elkarteko bazkideek hemen eskatuta. Otsailak 10 arte egin daiteke eskaera. Liburua eta mp3 audioak, biak eskatzeko aukera izango da. Bapateanek dakartza, besteak beste, Euskal Herri osoko bertso plazei buruzko informazioa, eskualdearen araberako saio kopuruak, aldizkako saio zein sariketen berri eta Xenpelar Dokumentazio Zentrora (XDZ) grabatuta iritsi diren bertsoaldien hautaketa bat. Lurraldetasuna, generoa, belaunaldiartekotasuna, saio mota, doinuen berritasuna… bezalako aldagaien baitan bereizitako bertsoaldiak dira, beti ere, bertsolari bakoitzaren saio kopuruan oinarrituta.

Aurtengo edizioari Unai Mendizabal Jauregik egin dio aitzinsolasa, Plazaren atzean izenekoa. Bertsoei dagokionez, Bapatean 2024k 687 bertso dakartza; 74 bertso saiotako 88 bertsoalditan multzokatuak. Gainera, bertsoaldi bakoitzari dagokion informazioa ematen da: gai, doinu, parte hartzaile, antolatzaile… bai eta saio bakoitzaren testuinguruari buruzko zertzeladak ere.

Bapatean 2024 liburuko bertsoaldien corpusak herritarrek antolatutako bertso saioetan bat-batean kantatutako hainbat bertso biltzen ditu; txapelketakorik ez dakar, ez bada herrialdeetako txapeldunen agurra edo gazte sariketatan kantatutakoak.

Bertsozale Elkarteak nabarmendu duenez, "Anitz jenderen lanaren emaitza da Bapatean 2024a. Borondatezko grabatzaileei esker jaso ahal izan ditugu ehunka bertso aldi eta zenbait potret. Eskerrik beroenak beraz, saio erdi, osorik edo hamaika grabatu, zein argazkiren bat egin eta XDZra helarazi dizkiguzuenoi".