Larunbatean 21:00etan ETB1n 2025-01-30

Lesakatik Bertso Eguna Hitzetik Hortzeran, Estitxu Fernandez gonbidatu dela

Bortzirietako Lesaka herriak hartu du aurtengo Bertso Eguna. Egun osoko egitarau oparoan, bertsoak eraikitako zubiak ezagutzeko aukera izan zuten bertaratutakoek eta zubi horiek eramango ditu ikus-entzuleen etxeetara aste honetako Hitzetik Hortzerak.

Lesakako bertsolaritzaren zubiak ederki ezagutzen ditu Estitxu Fernandezek eta berarekin elkartuko da aste honetan Mirari Martiarena. Tantirumairu Ikastolan iritsi zen bertsoa Estitxuren bizitzara eta ondoren Manolo Arozena eta Bittor Elizagoienek martxan jarritako bertso-eskolan hasi zen. Bertako oroitzapenez ariko dira solasean Estitxu eta Mirari.

Nafarroako bertsolari belaunaldi gazte taldeko kide izan zen; Estitxu Arozena, Xabier Silberia, Iñigo Olaetxea eta Amaia Telletxea ere tartean ziren. Bereziak izan ziren eurentzat 1995an Estitxu Arozenak irabazitako Nafarroako txapela eta 1997an Xabier Silveirak irabazi zuen lehena ere.

25 urtera arte aritu zen bertso plazan Estitxu Fernandez eta jende aurreko bertsolaritza utzi bazuen ere, gaur egun bere bizitzan duen lekuaz hitz egiteko ere aprobetxatuko dute.

Lesakako arratsaldeko jaialdia eta afal ondorengo bertso jarriak
Bertso Egunean arratsaldean Lesakako Harriondoan egin zen jaialdiko bertsoaldiak izango dira aste honetako programan. XXI mende, 25 (H)illbeltz izenburua izan zuen saioak eta Alaitz Rekondo aritu zen gai-jartzaile. Bertsotan berriz, Alaia Martin, Amets Arzallus, Julio Soto, Maddi Ane Txoperena, Maialen Lujanbio eta Peru Abarrategi aritu ziren.



Arratsaldeko jaialdiaz gain, Bertso Egunean Lesakako Linddurren Borda sagardotegian egin zen afal ondorengo bertso jarrietako batzuk ere ikusteko aukera izango da. Lesakako bertsolaritzari loturiko bertsoak kantatu zituzten Hor gu taldekoek Manex Pagola musikariak lagundurik.



Hitzetik Hortzera, larunbatean 21:00etan ETB1en.