2017-05-19

Bertsoberriz Altsasun zikloa martxan

Altsasuko Kima Euskara Taldeak eta Nafarroako Bertsozale Elkarteak antolatuta, martxan da Bertsoberriz Altsasun izeneko zikloa. Ekimen berri honek bertsolaritzaren zaletasuna zabaldu eta sustatu nahi du Altsasuko eta, oro har, Sakanako herritarren artean. Horretarako, bertsogintzaren alor ezberdinak erakusten dituen zikloa antolatu dugu.

Oraingoan bertso saioaren txanda da, puntako bertsolarien parte-hartzearekin. Larunbaterako, azaroaren 15erako, antolatu dugu Altsasuko Iortia kultur gunean, 20:00etatik aurrera.
Eszenatokian honako bertsolariak izanen dira: aurtengo Arabako txapeldun eta txapeldunorde diren Asier Otamendi eta Manex Agirre; Nafarroako txapeldun eta txapeldunorde diren Julen Zelaieta eta Jon Barberena; Gipuzkoako txapeldun den Aitor Mendiluze eta 2004an Bizkaiko txapeldun izandako Igor Elortza.

Bertsozale zorrotzena ere asetzeko moduko kartela. Sarrerak 3 eurotan izanen dira salgai Iortia kultur gunean. Sarrerarekin batera Joxe Iriarte Zufiaurre, Ttotto, bertsolaria eta bere garaiko Altsasu liburua erosten duenak 12 euro ordaindu beharko ditu. Antolakuntzaren aldetik bertso saioarekin gozatzea besterik ez dizuegu opa.

Zikloa despeditzeko hitzaldi bat dago iragarria. Altsasuko seme eta bertsolari zen Jose Iriarte Zufiaurre, Ttotto, bertsolariaren berri izateko aukera izanen dute Iortia kultur gunera hurbiltzen direnak. Aipatu bertsolariari buruzko liburua publikatu zuen duela bi urte Kima euskara taldeak. Lan haren idazketan aritu ziren Alfredo Alvaro Igoa eta Josema Leitzak hartuko dute hitza, bertsolariaren bizitzaren eta bertsokeraren berri emateko.

Hitzaldia, esan bezala, Iortia kultur gunean izanen da, azaroaren 20an, ostegunarekin, 19:30ean. Han elkar ikusiko dugulakoan, bitartean ongi izan.



Albiste gehiago

Jone Larrinaga Dañobeitia - Bertsolari Bertsozale Podkasta 2024-03-28

«Bertsolaritzaren garapena aberatsagoa da espektatibarik gabe»

Mikel Artola Izagirre - Gipuzkoako Bertsozale Elkarteko koordinatzailea 2024-03-26

«Gipuzkoan 10-50 urte bitarteko bertsolari ia denek kantatuko dute udaberrian»

Juanjo Uria Zubiarrain - Bertsolari bertsozale podkasta 2024-03-15

Juanjo Uria: bertsoa eragiletzatik eta pasiotik bizi duen hernaniarra

Araitz Katarain, Izaro Bilbao eta Janire Arrizabalaga - elkarrizketa 2024-03-13

«Bertso munduratze prozesu horretan sortzen diren gatazkak gorpuztuko ditugu, mimoz, arduraz eta umorez»

Larunbat gauean 21:00etan ETB1en 2024-03-07

Hitzetik Hortzera Xabier Rico Arabako txapel emailearekin