Otsailaren 22 arte luzatuko da fase hau 2025-02-11

Arabako Kuadrillartekoa, bertso egunak egiten

Arabako Kuadrillartekoa badoa aurrera hainbat herritan bertso egunak eginez. Aurten lehenengoz Arabako eskualde guztietan egingo dira eta 14 ekitaldi izango dira denera. Dagoeneko erdiak egin dira eta giro onean joan dira: Gasteizen, Aretan, Aramaion (bi), Oionen, Agurainen eta Kuartangon izan dira orain arteko zazpi bertso egunak.

Asteburu honetan, Gasteizen, Legution eta Elortzan
Asteburu honetarako hiru ekitaldi daude iragarrita. Ostiralean, Gasteizen eta Legution egingo dira eta larunbatean Elortzan. Lehenengo fase hau 22ko asteburuan amaituko da. Aste horretan, Gasteizen, Izarran eta Argantzunen izango dira azken hiru ekitaldiak.

Otsailaren 28an finalerdiak
Kuadrillartekoaren finalerdietako fasea otsailaren 28an hasiko da Narbaizan. Lau finalerdiren ondoren, Gasteizen izango da finala apirilaren 5ean.