Ostegunetik larunbatera 2025-02-19

Arabako Kuadrillarteko azken bertso egunak Gasteizen, Izarran eta Trebiñun

Jexux Mari Irazu

Lehenengo aldiz Arabako eskualde guztietara iritsita, aste honetan egingo dira Kuadrillarteko azken bertso egunak Gasteizen, Izarran eta Trebiñun, Argantzunen. Bertso poteoa, bertso txokolatada eta bertso bazkaria egingo dituzte bertsozaleak biltzeko. Hiru horiekin, denera 14 ekitaldi osatuko dituzte. Kanpo zein barruko ekitaldiak izan dira oro har. Bertso poteoak, Santa Ageda bueltako kopla saioak, bertso bazkariak, aretoko ekitaldiak... alderdi soziala eta bertsoa uztartu dituzte bertso egunek. Talde desberdinetako jendea lagunarte giroan biltzeko ere baliagarria izan da fase hau.



Lau finalaurreko eta finala Gasteizen, apirilaren 5ean
Bertso egunen fasea burututa, lehiaketa fasean sartuko da Arabako Kuadrillartekoa. Lau finalaurreko eta finala izango ditu datorren asteburuan hasita. Finala Gasteizen izango da apirilaren 5ean.