Mingañe Saltsan bertso afari sariketa 2025-02-24

Julio Soto irabazle Aresoko kanporaketan

Areson jokatu zen ostiralean Mingañe Saltsan bertso afari lehiaketako bigarren kanporaketa. Idoia Granizo, Julio Soto, Unai Mendizabal eta Maider Arregi aritu ziren kantuan, Iñigo Gorostarzuk aurkeztuta. Aretoko elkartea bete egin zen eta aldez aurretik agortu ziren sarrera guztiak. Julio Sotok irabazi zuen kanporaketa eta Maider Arregi gelditu zen bigarren. Bi horiek dute finalerako eskubidea, baina, Sotok ezin izango du martxoaren 14ko hitzorduan izan eta Unai Mendizabal ariko da bere lekuan, zizurkildarra sailkatu baitzen hirugarren.

Beraz, finalean ariko diren seitik lau erabakita daude: Maddalen Arzallus, Andoni Rekondo, Maider Arregi eta Unai Mendizabal. Finala Leitzan izango da.

Azken kanporaketa Errazkinen ostiral honetan
Mingañe Saltsan sariketako hirugarren kanporaketa ostiral honetan jokatuko da Errazkinen. Kantuan, Eli Pagola, Jon Maia, Kerman Diaz eta Oihana Iguaran.