Herrialdeetakoak eta Euskal Herriko finala 2025-03-04

Ostiralean hasiko da Eskolarteko Txapelketa, Gipuzkoan

Eskolarteko Txapelketak ostiral honetan hasiko du hiru hilabeteko bidea, Bertsozale Elkarteak eta Ikastolen Elkarteak lankidetzan antolatuta. Egutegian, Gipuzkoako Eskolartekoa jokatzen da lehenik. Ondoren, Nafarroakoa, Arabakoa, Bizkaiakoa eta Xilabako Gazte Xapelgoak isten du herrialdeetakoa. Bukatzeko, Euskal Herriko finala, herrialde bakoitzean aurren-bigarren gelditu diren bertsolariekin.

Lau kanporaketa eta finala Gipuzkoan, Errezilen hasita
Gipuzkoako Eskolartekoan 26 bertsolari gaztek hartuko dute parte aurtengo edizioan. Lau kanporaketa eta finala izango ditu eta aurten finalean aldaketa egongo da. Urte askoan Lasturren egin izan da, bertsolari gazteen asteburupasarekin batera eta aurten Azpeitian jokatuko da. Kanporaketak Errezilen, Aretxabaletan, Amasan eta Aizarnazabalen izango dira, elkarteetan eta afalondoko formatuan. Iaz, June Aiestaranek jantzi zuen txapela eta Joanes Azpillaga gelditu zen txapeldunorde.

Saioak elkarteetan afalondoan
Gipuzkoako Eskolarteko kanporaketak elkarteetan egiten dira afalondoan, giroaren eta bertsotarako baldintzen mesedetan. Lehenengo kanporaketan zazpi bertsolari gazte ariko dira kantuan: Amets Zubizarreta, Danel Etxeberria, Jakes Etxeberria, Jare Antzizar, Julen Olaizola, Kattalin Arabaolaza eta Uhaitz Oiarzabal. Afaritarako sarrerak eskuragarri daude www.bertsosarrerak.eus atarian.