Donostiako Intxaurrondo eta Mendaroko bertsoak Hitzetik Hortzeran, Marisa Barrena wikilari bertsozalearekin

Donostiako eta Mendaroko bertsoak izango dira aste honetako Hitzetik Hortzeran. Alde batetik, Donostiako Intxaurrondo auzoko Emakumea eta kirola bertso saioa dakar pantailara, Intxaurrondoko Emakumeen astearen baitan antolatu zutena. Ainhoa Urienek aurkeztu eta gidatu zuen saioa, eta Alaia Martin, Eli Pagola eta Oihana Iguaran aritu ziren bertsotan.

Bestetik, Mendaron, Motxaila egunaren baitan, urteroko jaialdia egin zuten. Hango bertsoaldiak ere izango ditugu entzungai Hitzetik Hortzeran. Joanes Illarregi, Jone Uria, Julio Soto eta Nerea Ibarzabalek egin zuten bertsotan. Gai-jartzaile lanak berriz Ainhoa Urbietak egin zituen.

Marisa Barrena, wikilari bertsozalea
Marisa Barrena wikilari bertsozalea izango da aste honetako gonbidatua Hitzetik Hortzeran. Ostiralero Durangoko Andragunean elkartzen da Euskal Wikiemakumeok osatzen duten taldeetako bat. Euskaltzalea, ekintzailea eta bertsozale feminista. Emakumeak eremu digitaldean bistaratzearen kezkatik abiatuta hasi ziren elkartzen eta, hasi zirenetik orain arte, 9.000 emakumeren biografiak sortu eta itzuli dituzte.