Maiatzak 3, 19:00etan Gernikako Gaztetxean 2025-04-29

Gaztetxeak Bertsotan sariketako finala larunbatean Gernikan

Gaztetxeak Bertsotan sariketako finala jokatuko da Gernikan larunbata honetan. Hainbat bertsolari gaztek antolatatuko sariketa da, gaztetxeetako asanbladekin batera. «Gazteontzako zirkuitu bat sortu nahi du, gazteok pentsatua eta antolatua. Festagiroko saio eroso eta dibertigarriak izatea nahi dugu, eta aldi berean, gazteon kezkekin lotutako ahots kritiko eta politizatuei ere tokia eman. Uste dugu gaztetxeak espazio ezin hobeak direla horrelako egitasmo baterako. Eta ekimen honek bi helburu izan ditu nagusiki: batetik, bertsolari gazteei plaza eskaintzea, lehen aipaturiko premisen baitan. Bestetik, gaztetxeen eta bertsoaren arteko harremana estutzea. Alegia, gaztetxeen inguruan dabiltzan belaunaldi berriak bertsozaletzea edo bertsoarekiko gertutasuna sentiaraztea eta, era berean, bertsozalea den edo bertso munduan dabilen jendeak gaztetxeekiko eta politikarekiko gertutasuna sentitzea».

24 bertsolari gaztek parte hartu dute sariketan, binaka. Finalean hiru bikote izango dira: Aroa Arrizubieta eta Unax Aizpurua, Gorka Pagoabarraga eta Ekhi Zuluaga eta Maddi Aiestaran eta June Aiestaran. 19:00etan izango da finala baina larunbatekoa egun osoko ekitaldia izango da eta eguerdian bertso poteoa izango da sariketan parte hartu duten bertsolariekin. 12:00tatik aurrera izango da hori. Ondoren bazkaria. (Bertan apuntatzeko eman izena formularioan: https://forms.gle/4AP3k6zS5e8rtZQu5). Bazkalostean, umoregileak izango dira: Lide Arregi eta Manex Astigarraga. 19:00tan finala eta 22:00etan kontzertuak: Desgaraian, Mikosis eta Maridjo.