Muxikan jokatu zen finala larunbatean 2025-06-23

Aitor Bizkarrak irabazi du Argi Baltza Sariketa

IV. Argi Baltza Sariketako finala jokatu zen larunbatean Muxikan eta Aitor Bizkarrak eraman zuen txapela, Asier Galarzarekin buruz burukoa jokatuta. Maider Arregi gelditu zen hirugarren, June Aiestaran laugarren, Koldo Gezuraga bosgarren eta Jon Gurrutxaga seigarren. Maider Arregik agurrean umorez bota zuen bezala, June Aiestaran eta 96ko kintoak aritu ziren kantuan, 29na urteko bost finalista. Ander Elortegik jantzi zion irabazleari txapela. Finalean Onintza Enbeita aritu zen aurkezle lanetan. Epaile, ostera, Ander Arrien, Beñat Romero eta Mirari Azula. Finala Muxikako Urretxindorra ikastolan eta 100 inguru bildu ziren. 

Sariketen zirkuituan bere lekua egin du Argi Baltzak
Jon Lopategiren lanaren omenez sortutako Argi Baltza gazte sariketak lau urteko bidea egin du Lilibertso Gernika eta eskualdeko bertso eskolaren eskutik. 30 urtez beherako bertsolarientzat dago planteatuta eta Euskal Herri osoko sariketa da, eskualdeko bertsolarien ere bere lekua uzten diena. Hiru herri jakinetan egiten dira kanporaketak: Mendatan, Ajangizen eta Gautegiz Arteagan eta aurten ere erantzun ona jaso. Finala Muxikan, Jon Lopategi zenaren herrian. 18 bertsolari hartzen dute parte eta bertso eskolak antolaketa lan handia hartzen du bere gain. Urte gutxitan, erreferentzialtasuna lortu du Argi Baltzak eta sariketen mapan bere lekua egin du.