12 zahar-etxeetan egin dira saioak 2025-07-04

Harrera beroa Bizkaian adinekoei eskainitako Adin-adin proiektuak

Bertsoa zahar-etxeetan bizi diren adineko pertsonei eskaintzeko Adin-adin proiektuko aurtengo azken saioa egingo da Markina-Xemeinen. Iaz saio esperimental batzuk egin ziren Bizkaian eta aurten 12 saioko zikloa egin da Lankuren ekimenez, Foru Aldundiak lagunduta. Gernikan, Diman, Ondarroan, Zeberion, Lekeition, Durangon, Otxandion, Leioan, Bermeon, Sondikan eta Zornotzan izan dira gainerako saioak. 

Libreko saioak izan ohi dira, bertsoak ez ezik entzuleen interesekoa izan daitekeen istorioen kontakizuna, kantuak eta zuzeneko tratuak ere paper handia jokatzen dute saioetan. Bi bertsolari izaten dira saio bakoitzean, belaunaldi ezberdinetakoak. 15 bertsolarik hartu dute parte edizio honetan. 

13 urteko bidea daraman proiektua, Lankuren eskutik
Proiektuaren urteetako esperientziak erakutsi du, egoitzetako ordezkariak hala esanda, bertsoak eta kantuak adineko pertsonen gogoa eta gaitasun kognitiboak pizteko eragin positiboa duela. Oso harrera beroa izaten dute saioek eta batez ere adineko pertsonen arreta azpimarratzen dute adituek.

Orain artean, Gipuzkoan izan du zabalkunderik handiena. Iaz, esaterako 30 saio egin ziren 24 herri desberdinetako zentroetan. Urte askotaren lanaren ondoren, aurten Bizkaian ere hartu du gorputza proiektuak. Beste herrialdeetan ere zabaltzeko ahaleginetan ari dira proiektuaren bultzatzaileak.