Uztailaren zazpian hasita 2025-07-04

Sanferminetan bertsoak ere bai

Hamar bertso ekitalditik gora behintzat izango dira aurten ere Sanfermin jaien bueltan. Nola ez, Iruñean izango dira gehiena. Zazpi saio izango dira uztailaren 7tik 13ra. Lesakan urteroko jaialdia: uztailaren zazpian eta arratsaldeko zazpietan. Horrez gain, beste zenbait herrietan ere bai: Azkaraten, Hernaniko Martintegi auzoan edo Pasaian, kasurako. 

Iruñean azken urteeotan bertso eskaintza kokapen aldetik festaren erdigunera ekartzera lortu dute: Sarasate plaza zentrikoan egiten dira jaialdi nagusiak eta elkarteetan edo balkoitik balkoira gainerakoak. Hiru jaialdi izango dira aurten Sarasaten, bi ohikoak eta jaialdi musikatu bat. 0 plazan egingo da beste jaialdi bat. Udalak antolatzen ditu saio batzuk, Bertsozale Elkartearekin elkarlanean eta herri antolakuntzak gainerakoak: Herri sanferminek, kultur elkarteek edo peñek. Hamasei bertsolari ariko dira kantuan eta lau gai-jartzaile ariko dira saioak bideratzen. Hiru saio librekoak izango dira. 

Lesakan, urteroko jaialdia
Lesakako Sanferminetan bertsoak ez du hutsik egiten. Kokapen desbedinak izan ditu eta azken urte luzeetan herriko plazan egiten da. Aurten, Andoni Egaña, Nerea Ibarzabal, Maialen Lujanbio, Josu Sanjurjo eta Julen Zelaieta ariko dira kantuan. Gai-jartzaile lanetan, Ekhiñe Zapiain. 

Nafarroako Araitz bailaran dagoen Azkarate herrian ere Sanferminetan ospatzen dituzte herriko jaiak. Egun pasako saioa da, librean. Aurten  Sebastian Lizaso eta Iker Zubeldia ariko dira.