Herrialdeetako lau txapelketa datozen hilabeteetan 2025-09-03

Txapelketak: Bizkaia, Nafarroa, Xilaba eta Arabako Txapelketak irailetik martxora

Jexux Mari Irazu

Udazkenean eta neguan Bizkaia, Nafarroa, Xilaba eta Arabako Txapelketak jokatuko dira, hurrenkera horretan eta hor argituko da Txapelketa Nagusiko parte hartzea, herrialdeetako bertsolariei dagokionez. 2024an jokatu zen Gipuzkoakoa eta erabakita dago herrialde horretako parte hartzea. Datorren urtean jokatuko da Txapelketa Nagusia eta abenduaren 20an izango da finala Nafarroa Arenan, Bertsozale Elkarteak zabaldu berri duenez.

Araba, Nafarroa eta Xilabatik bina bertsolari gehiago Txapelketa Nagusian
Bertsolari kopuruari dagokionez, Arabatik, Nafarroatik eta Xilabatik bina bertsolari gehiago sailkatuko dira. Beraz, aurreko edizioan baino sei bertsolari gehiago izango ditu Txapelketa Nagusiak lehen fasean: 42 bertsolari. Ohi gisan, txapelduna finalean sartuko da eta gainerako finalistak finalaurrekoetan. 

Herrialdeetako finalak eta datak
Nafarroako finala jokatuko da lehenbizi, azaroaren 29an, Nafarroa Arenan. Urriaren 4an hasiko da txapelketa. Bizkaiko finala etorriko da ondoren: abenduaren 20an, Bilbon, Casillan. Irailaren 28an hasiko da Bizkaiko Txapelketa. 

Ondoren, Xilabako finala etorriko da, urtarrilaren 31n Donibane Lohizunen Jai Alai pilotalekuan. Abenduaren 6an hasiko da Xilaba. Azkenik, Arabako finala jokatuko da martxoaren 28an Gasteizko Europa Jauregian. Otsailean ekingo dio Arabako Txapelketak.