Nafarroako Txapelketa - lehen fasea 2025-10-22

Nafarroako lehen faseko azken saioa Los Arcosen

Jexux Mari irazu

Nafarroako Bertsolari Txapelketako lehen faseko azken saioa jokatuko da igande honetan, Los Arcosen. Ekain Alegre, Joanes Illarregi, Kattin Madariaga, Mikel Lasarte, Saioa Alkaiza eta Xabier Maia ariko dira kantuan, Ander Aranburuk gaiak jarrita. Saioko irabazlea zuzenean sailkatuko da finalerdietara. 

Dagoeneko 12 bertsolari sailkatuta
Nafarroako Txapelketako lehen fase honetan 24 bertsolarik kantatzen dute eta 18 sailkatuko dira finalaurrekoetara. Beraz, zuzenean sailkatuta daudenez gain, behin-behineko sailkapenean dagoeneko sei atzetik dituzten bertsolariak ere matematikoki sailkatuta daude. 

Hiru saio jokatuta, zuzenean sailkatuta daude Eneko Lazkoz, Julio Soto eta Xabat Illarregi, Auritz, Mutiloa eta Iruritako saioak irabazita. Eta jada matematikoki sailkatuta daude honako bertsolari hauek ere: puntuazioaren hurrenkeran, Endika Legarra, Sarai Robles, Josu Sanjurjo, Ekhiñe Zapiain, Saats Karasatorre, Julen Zelaieta, Amaia Elizagoien, Jabi Lezaun eta Ekhi Mateorena. Hortik atzera dauden bost bertsolarik ere oraindik matematikoki aukera dituzte, azken saioko puntuazioaren baitan. Egoera horretan daude Patxi Castillo, Egoitz Gorrosterrazu, Idoia Granizo, Urko Gartzia eta Beñat Astiz.

Finalerdiak Agoitzen, Leitzan eta Tafallan
Nafarroako Txapelketak hiru finalerdi izango ditu eta Agoitzen, Leitzan eta Tafallan jokatuko dira. Nafarroa Arenako zortzikotea Tafallan argituko da beraz, lehenengoz.