Larunbatean 21:00etan ETB1en 2025-10-29

Bizkaiko Txapelketa eta Besaingo jaialdia Hitzetik Hortzeran

Bertsozale askorentzat ezaguna da aste honetako Hitzetik Hortzerako gonbidatua: Egoitz Aizpuru. 1999ko Gipuzkoako Herriartekoan Oñatiko taldeko gai-jartzailea izan zen, eta ondoren, urte askoan aritu zen gai-jartzaile bezala, bai txapeletetan, baita jaialdi desberdinetan ere.



Antzerkia probatu zuen gero, eta antzerkiaren barruan, antzerki inprobisatua. Hura lantzeko ikastaro batzuk egiten Madrilera (Espainia) joan-etorrian ibili ondoren, bertan geratzea erabaki zuen, eta formazio jarraitua egitea. Gaur egun, aktore inprobisatzaile izateaz gain, antzerki inprobisatuko irakaslea da Bilbon. Bere jakintza horretatik, antzerki inprobisatuaren ezaugarriei buruz, bertsolaritzarekin dituen antzekotasun eta desberdintasunei buruz hitz egingo dute Aizpuruk eta Mirari Martiarena saioko aurkezleak.

Esan bezala, urte asko egin zituen Aizpuruk gai-jartzaile gisa. Eta urte haiek ere gogoratuko dituzte larunbateko programan: txapelketako gai-jartzaileen bilerak edota Hamaika Bertute taldean egindako esperimentuak izango dituzte hizketagai.



Beasaingo jaialdiko eta Bizkaiko Bertsolari Txapelketako bertsoek jantziko dute programa
Astero moduan, bertsoek ere tartea izango dute Hitzetik Hortzeran. Batetik, Beasaingo Arrano Elkarteak urtero antolatzen duen jaialdiko bertsoaldiak izango dira programan. Maitane Legarretak egin zituen gai-jartzaile lanak eta bertsotan aritu ziren Aitor Sarriegi, Alaia Martin, Amets Arzallus, Igor Elortza, June Aiestaran eta Nerea Ibarzabal.

Bestetik, Bizkaiko Bertsolari Txapelketa finalerdietan sartu da eta asteroko jarraipena egingo du Hitzetik Hortzerak. Zeanurin izan zen lehen finalerdia eta hango bertsoaldiak eskainiko dira. Bertsotan aritu ziren Aissa Intxausti, Aitor Bizkarra, Bittor Altube, Imanol Uria, Jone Uria eta Oihana Bartra, Beñat Vidal gai-emailearen gaiei erantzunez.

Hitzetik Hortzera: larunbatean, 21:00etan, ETB1en.