Nafarroako txapelketa - finalaurreak 2025-11-11

Tafallan argituko da Nafarroako finaleko zortzikotea

Jexux Mari Irazu

Igande honetan Tafallan argituko da zein zortzi bertsolarik kantatuko duten Nafarroako finalean, azaroaren 29an Nafarroa Arenan. Hitzordu honek badu berezitasun bat: azken finalaurrekoa Tafallan jokatzen den lehen aldia da. Oholtzan sei bertsolari: Xabat Illarregi, Amaia Elizagoien, Josu Sanjurjo, Joanes Illarregi, Ekain Alegre eta Xabi Maia, Zigor Gartziak aurkeztuta. Kultur gunean, 17:30etan. 

Lazkoz eta Soto sailkatuta 
Egungo Nafarroako txapelduna eta txapeldunordea finalean dira jada, beren saioak irabazita. Agoitzen gailendu zen Eneko Lazkoz; Leitzan Julio Soto. Tafallako irabazlea ere zuzenean sailkatuko da. 

Puntuazioaren baitako bost postuak erabakitzeke daude matematikoki. Puntuazioak eta postuak aintzat hartuta, badirudi Saioa Alkaiza eta Ekhiñe Zapiain finalean izango direla. Hortik atzera, aukerak gehiago zabaltzen dira. Oraingoz, Sarai Robles, Ekhi Mateorena eta Julen Zelaieta dira, hurrenkera horretan, aukera gehien dituztenak.


1- Julio Soto---------- 526.5 (zuzenean sailkatua)
2- Eneko Lazkoz----- 508 (zuzenean sailkatua)
3- Tafallako irabazlea  (zuzenean sailkatua)
4- Saioa Alkaiza------ 496
5- Ekhiñe Zapiain---- 494
6- Sarai Robles------ 494
7- Eki Mateorena---- 488
8- Julen Zelaieta----- 458

Finalista berri bat ziur
Aurtengo Nafarroako finalak finalista berri bat izango du ziur, Saats Karasatorrek ez baitu finalaurrekoetan parte hartu. Postu horretarako Ekhiñe Zapain bertsolari beratarrak ditu oraingoz aukera gehien. Eki Mateorena ere finaleko postuetan dago oraindik. Leitzarrak ere lehenengo finala izango luke. Horrez gain, Tafallako taldetik, Amaia Elizagoien eta Ekain Alegre ere inoiz finalean kantatu gabeak dira. Beraz, haietako sailkatuko balitz ere finalista berria litzateke. 


Sarrerak www.bertsosarrerak.eus-en
fAzken finalaurrekorako eta finalerako sarrerak bertsosarrerak.eus atarian daude eskuragarri.