Xilaba txapelketa - final aitzinekoak 2026-01-11

Miren Artetxe Xilabako finalera, Baigorriko final aitzinekoa irabazita

Erredakzioa

Xilabako lehen aitzinekoa jokatu zen atzo Baigorrin, ia 500 lagun bilduta. Miren Artetxe Sarasola gailendu zen 551,5 punturekin eta, beraz, hendaiarrak Xilabako finalean kantatzeko zuzeneko txartela eskuratu du. Artetxek orain arteko bere saio guztiak irabazi ditu Xilaban, hirutik hiru. Maddalen Arzallus sailkatu zen bigarren postuan 535,5 puntu eskuratuta, Artetxerengandik 16 puntura. Puntuazio horrekin Arzallusek finalean izateko pauso sendoa eman du. Hortik atzera, aukerak zabalago daudela dirudi, Bardozeko final aitzinakoaren baitan. 

Hona hemen Baigorriko sailkapena
Miren Artetxe Sarasola----------------551.5
Maddalen Arzallus Antia---------------535.5
Elixabet Etxandi Goihenetxe----------518.5
Haira Aizpurua Ibargarai--------------511
Mizel Mateo Sallaberry----------------501.5
Nahia Sasco Etxeberri----------------452

Joana Itzaina Malharin aritu zen gai-jartzaile lanetan. Epaile lanetan: Abel Zabala Elizazu, Maialen Berra Zubieta, Iban Thicoipe, Jon Garmendia Martinez Txuria,  Lur Renteria eta Eneko Bidegain Aire.

Azken final aitzinekoa Bardozen, urtarrilaren 17an, Ezker Paretan, 17:00etan
Bardozen argituko da Xilabako finaleko seikotea. Sei bertsolari hauek ariko dira kantuan Ezker Paretan, Ekhi Erremundegi Belokik gaiak emanda:

    Aitor Servier Etxexuri
    Irantzu Idoate Funosas
    Karlos Aizpurua Etxarte
    Maddi Ane Txoperena Iribarren
    Patxi Iriart Hiribarren
    Ramuntxo Christy Biscay

Seikote honetan orain arteko bidean Maddi Ane Txoperena nabarmendu da gehien, bere bi saioak irabazita. Ramuntxo Christyk eta Aitor Servierrek bana irabazi dute.