larunbatean, 21:00etan, ETB1en. 2026-03-05

Pasaia eta Iruñeko bertsoak Hitzetik Hortzeran, Lazkao Txikiren tatuajeak elkarrizketagai direla

Pasaian Bixi-bixi elkarteak urtero antolatzen duen jaialdiko eta Nafarroako Bertsoaroko bertsoak izango dira aste honetan Hitzetik Hortzeran. Alaia Martin Etxebeste, Maddi Ane Txoperena Iribarren, Maialen Lujanbio Zugasti eta Sustrai Colina Acordarrementeria aritu ziren Pasaian, Amaia Agirre Arrastoak gaiak jarrita.


Iruñean Aitor Etxebarriazarraga Gabiola, Aroa Arrizubieta Barredo, Eneko Lazkoz Martinez, Maddi Ane Txoperena Iribarren, Nerea Ibarzabal Salegi eta Saats Karasatorre Martinez, Alaitz Rekondo Ferreroren esanetara.

Lazkao Txikiren tatuajeak
Lazkao Txikik belaunaldi berriengana iristen jarraitzen du. Urteak daramatza Lazkagao Tattoo artistak tatuajeak egiten. Pandemian, Joxe Miel Iztueta Lazkao Txikiren marrazki bizidunak ikusten hasi zen berriz, eta orrietan bere irudiak zirriborratzen zituen. Lagun artean gustatu, eta bertsolariaren tatuajeak egiten hasi zen lagunei.


Tatuaje horiei buruz hitz egingo dute aste honetako programan baina, horrez gain, nola hasi zen tatuajeak egiten eta artistikoki tatuatu nahi izaten duenari buruz ere hitz egingo dute.

Xalbadorren bertso jarriak, 'Lukas adixkideari'
Aste honetan Lukas Adixkideari izeneko bertso sortarekin amaituko da programa, Fernando Aire Xalbadorren sortarekin. Lukas Urepeleko herritar bat zen, Amerikara gazterik joana. Behin, Lukasek Amerikatik dirua igorri zion Urepeleko erretoreari bazkaria egin zezaten lau lagunek; tartean zen Xalbador. Lukasi eskerrak bidaltzeko, bertsoak jartzeko eskatu zioten lagunek Xalbadorri.

Ohi bezala Ainhoa Sarasua Laskaraik eta Eñaut Agirre Goiak kantatuko dituzte bertsoak eta Manex Pagola Apezetxea musikaria izango dute ondoan.

Hitzetik Hortzera: larunbatean, 21:00etan, ETB1en.