Iñaki Viñaspre Simon - Arabako txapelduna 2026-04-01

«Bertsotan saiatzen naiz entzule bezala eskertzen dudana ematen»

Jexux Mari Irazu

Barruko pozetik eta perspektibaz hitz egin du Iñaki Viñaprek Bertsoa.eusi eskainitako elkarrizketan,  Abetxukuko auzo elkartean. Arabako finala bera final oso bat atera izanaren poza du bereziki. Seikotearen arteko harreman-hariak azpimarratu ditu eta iruditzen zaio horrek final on baterako oinarriak jartzen lagundu zuela. 42 urterekin, aspaldiko Arabako finalik gazteenean txapeldun beteranoena edo beteranoenetako bat bihurtu da abetxukoarra.

Bertsolari gisa, aitortu du entzule bezala eskertzen duena ematen saiatzen dela bereziki: «ideiak», «originaltasuna», «freskotasuna», «erantzutea»... horrek erakartzen du eta horretan saiatzen da. 

Euskal Herriko Txapelketan lehen aldiz kantatuko du eta ilusioa egiten dio. Kantatzeak ez ezik, Arabako beste hiru sailkatuekin entrenatzeko biltzeak motibatzen du. 

Egungo bertsolaritzaren indargune nagusitzat transmisioan asmatu izana ikusten du eta belaunaldi berriek lekukoa hartu izana.