Maiatzaren 19an da finala Uztaritzen 2026-04-08

12 bertsolari gazte Hernandorena sariketan

Jexux Mari Irazu

Bi urtez behin jokatzen da Hernandorena Sariketa eta datorren astean hasiko da aurtengo edizioa. Bertsularien Lagunak Elkartearen eskutik, Euskal Herri osoko 12 bertsolari gaztek hartuko dute parte. Bi kanporaketa eta finala izango ditu. Maiatzaren 19an jokatuko da finala sei bertsolarirekin, Uztaritzen. 

Lehenbiziko kanporaketa apirilaren 18an jokatuko da Pagolan, Auztegian 19:00etan, eta honako seikotea ariko da kantuan: Irati Alcantarilla, Pagoa Bidart, Araiz Katarain, Josu Txoperena, Irantzu Idoate eta Nahia Etxeberri. Aritz Bidegain ariko da gai-emaile lanetan.

Bigarren kanporaketa apirilaren 24an da Hendaian eta kantuan ariko diren bertsolariak, hauexek: Sabin Abarrategi, Kattin Madariaga, Johane Larre, Danel Herrarte, June Aiestaran eta Izaro Bilbao.