Ekainaren 20an Leitzan 2026-05-19

Bardo Eguna Nafarroan bertso eskolak saretzeko

Nafarroako helduen Bertso Eskoletako kideak elkartu eta sarea trinkotzeko helburuz Bardo Eguna ospatuko dute Leitzan ekainaren 20an. Taldekako bertso txapelketa bat izango du funtsean egitarauak, taberna girokoa, eta otorduez lagundua.

Bardoak ekimena 2012an jarri zen abian bi urteko maiztasunez, banakako txapelketarekin txandaka. Zazpi edizio egin dira ordutik eta 2022an egun bakarrera ospatu zen Bardo Eguna. Aurtengoan ere formatu horretan egingo da bertso eskolak saretzeko ekimen hau.

Bi saio jokatuko dira, bata besteren atzetik, Leitzako bi tabernatan. Horietako bakoitzean nagusitzen den taldea zuzenean sailkatuko da finalera. Afalostean jokatuko da finala.

Izen-ematea, webgunean
Bertsolari edo gai-jartzaile gisara hartu liteke parte taldekako txapelketan, baina ezinbestekoa izango da aldez aurretik izena ematea, maiatzaren 31 baino lehenago. Saio guztiak irekiak dira, afaria ere bai. Afaritarako ere aldez aurretik izena eman beharko da eta aurrerago zabalduko da honetarako aukera.