Ekainean hasiko da 2026-05-21

Bizkaiko Taldekakoa: 14 talde eta irailean finala

Bizkaiko bertsolaritzaren oinarria indartzeko helburuz Taldekako Txapelketa egiten da Bizkaian, bi urtez behin. 2017an egin zen lehenengoz, eta bosgarren edizioa abiatzera doa. Denera, 14 taldek hartuko dute parte; ekainaren 5etik aurrera hasiko dira saioak eta irailaren 12an jokatuko da finala, Bizkaiko Bertsozale Elkartearen egunarekin batera.

«Taldekakoaren bitartez oinarrian eragin gura da, hau da, bertso eskolak eta eskualdeak indartu gura dira. Horretarako, gune ludiko bat eskaini gura du Elkarteak. Taldekakoa giro informalean eta jai-giroan gauzatzea da helburua», adierazi du Bizkaiko Bertsozale Elkarteak. 

Finalaurrekoak eta finala iraialaren 12an jokatuko dira, Elkartearen egunarekin batera. Egun osoko jaia izango da, goizean finalaurrekoak, ondoren bazkaria eta bazkal ostean finala. Finalaren egunean, beraz, bost talde batuko dira; kanporaketetako talde irabazleak. Bazkal aurretik finalaurreko bi jokatuko dira, batean hiru taldek eta besteak talde bik jokatuko dute. Finalaurreko bakoitzeko talde irabazleak jokatuko du finala.