Zuzeneko elkarrizketak 2010-04-14

Maialen Lujanbiori elkarrizketa gaur

 Aste Santuko atsedenaren ondoren, Bertsoa.com-ek zuzeneko elkarrizketekin jarraituko du aste honetan. Oraingoan Maialen Lujanbio izango da gonbidatua.

 Maialen Lujanbio Euskal Herriko Bertsolari Txapelketa Nagusian txapeldun gelditu zen 2009an, 1997tik finalean egon ondoren. 2001ean ere txapeletik gertu gelditu zen.

 Plazan asko aritzen den bertsolaria da, askotan aipatzen denez bertsotan egiteko modu berri bat ekarri duena.

 Orain dela aste batzuk San Frantziskon izan zen Andoni Egañarekin batera, bertsotan. Gainera, plazako ohiko jardunetik kanpoko zenbait saio egin izan ditu, "Ornitorrinkus" emanaldi berezia, esate baterako. Ikuskizun horrekin Veneziako Bienalean izan zen, gainera, iaz.

 Azken urteotan hausnarketa asko egin izan ditu emakumeak bertsolaritzan daukan presentziari buruz eta generoak plazan duen pisuaren inguruan. Azpiko loturetan Arrasaten Ainhoa Agirreazaldegi eta Uxue Alberdirekin batera emandako hitzaldiaren lotura daukazue.

 Elkarrizketa, esan bezala,gaur izango da, arratsaldeko 17etan. Nahi izanez gero galderak bidaltzeko aukera izango duzue. Hauxe da helbidea: info@bertsoa.com.

• 
•