Maialen Lujanbio 2010-04-15

"Bertsoa bapatekoa da, jarrera ez"

Maialen Lujanbiok bere bertsogintza bidearen klabeak azaldu ditu, pausoak, jarrera lanketa eta erabaki kontzienteak, Bertsoa.com-ek zuzenean egindako elkarrizketan. Lujanbioren esanetan, garapena intuitiboa izan da, ez metodikoa, eta barruak eskatu ahala egin du bidea: bere oholtzako rola kuestionatuz, ahotsa landuaz, kontakitzun teknika bat garatuaz eta teknika hori bere ikuspegi ideologikoa plazaratzeko tresna bihurtuz, besteak beste.

"Txapelaren digestio barea izan dut"
Maialen Lujanbiok txapel ondoren barea izan duela dio, lasaia. Oholtzan ez du ardura aldaketa handirik somatu, nahiz aitortu kanpotik halako "txapeldun ardura" sentsazioa iristen zaiola. Atal honetan, txapelketan zer landu duen, eta zertan asmatu duen ere kontatzen du. Baita bere lau bakarkakoak egoera politikoari kantatu izanaren zergatia ere.

Maialen Lujanbio San Frantziskon izan berri da Egañarekin batean, hango Euskal Etxearen 50garren urteurrena ospatzen. Generoaren gaian uste du momentu interesgarrian dagoela bertsolaritza, egindako bideagatik eta atzetik datozen emakumeak oso sentsibilizatuta ikusten dituelako.