Aurtengoa 19. edizioa izango da 2010-04-29

Martxan dago Lazkao Txiki Bertsopaper Lehiaketa

 Aurten ere Lazkao Txiki Bertsopaper Lehiaketa antolatu du Ordiziako Argi Berri Elkarteak, Ordiziako Udalaren laguntzaz. Aurtengoa 19. edizioa izango da. Hiru kategoria bereizi dituzte antolatzaileek.

 Gaztetxoek, 13 urtera artekoek alegia, honako gai honi buruzko bertsoak idatzi beharko dituzte: "Etxeko jostailuak biltzen ari naiz". Gutxienez 2 eta gehienez 4 bertso idatzi beharko dituzte. Irabazleak 200 euro irabaziko diru, bigarrenak 100 eta hirugarrenak 50.

 Gazteen mailan 14 eta 18 urte arteko partehartzaileak sartzen dira. Gai librea izango dute, eta gutxienez 8 eta gehienez 12 bertso idatzi beharko dituzte. Sariak honako hauek izango dira: irabazleak 300 euro, bigarrenak 200 eta hirugarrenak 100.

 Azkenik, helduek, 19 urtetik gorakoek alegia, gai librea izango dute. Bertso kopurua, gazteenaren berdina izango da: gutxienez 8 eta gehienez 12. Kategoria honetako irabazleak 500 euro poltsikoratuko ditu, bigarren gelditzen denak 400 eta hirugarren gelditzen denak 300.

 Parte hartzaile bakoitzak nahi adina sorta aurkeztu ahal izango ditu, baina inon argitaratu gabekoak izan beharko dute. Lanak bidaltzeko epea UZTAILAREN 1ean bukatuko da. Lanak bidaltzeko bi aukera egongo dira.

 Postaz bidali nahi izanez gero, honako hau da helbidea:

   ARGI BERRI ELKARTEA (Lazkao Txiki Bertsopaper Lehiaketa)
   Gipuzkoa Kalea 15-behea
   20240 Ordizia
   Gipuzkoa

 Lanak izenordainez bakarrik sinatuko dira, eta originalarekin batera beste lau kopia bidali beharko dira. Beste gutunazal batean, izenordearekin batera bidaliko dira gainerako datuak: egilearen izenordea eta izena, adina (jaiotze data), helbidea, telefono zenbakia... Lanak ordenagailuz edo makinaz idatzirik bidali beharko dira, bertso bakoitzari bere ordena-zenbakia jarrita. Doinua ere zehazteko eskatzen da.

 Lanak posta elektronikoz ere bidali ahal izango dira. Honako hau da helbide elektronikoa: aitor-c@ahize.aek.org

 Sari banaketa 2010eko Irailaren 12an egingo da, Ordiziako Euskal Jaien barruan.

• 
•