San Ferminetako saioa Iruñean 2010-07-14

"Hara hor sei obispo adar eta guzti"

Asteartea eta 13, egun seinalatua San Ferminetako bertso jaialdi nagusirako. Horixe gogora arazi zien Alaitz Rekondok sei bertsolariei saioari hasiera emateko, agurren ondoren.  Estitxu Arozena, Andoni Egaña, Jon Maia, Uxue Alberdi, Saioa Alkaiza eta Eneko Lazkoz aritu ziren kantuan, eta publikok itzaletik berotu zuen saioa. Egañak eta Lazkozek bi zezenen paperean kantatu zuten "A San Fermin pedimos..." kantua entzuten dute, baina ezer ulertu ez. Maia eta Alberdi Jone Jakue bidea egiten ari ziren bi erromes, bidean galdu eta Iruñeako alde zaharrean agertu ziren: "beltz-beltzak datoz eta/potoloak noski, hara hor sei obispo/ adar eta guzti" bota zuen Maiak. Esttxu Arozena Albret-tarren ondorengo gisa jarri zuen bakarka Rekondok,  Nafarroako erregetza aldarrikatzen. Egañak, Del Bosque Espainiako entrenatzaileak, atzeko bostak izan zituen kantu-gai. Atzekoak selekzioko jokalariak ziren gaian, baina, Egañak pertsonai berriak asmatu zituen, tartean erregina txalo jotzen ere asmatzen ez zuena. Bukaera aldera, San Fermin hirukoiztu egin zuen Rekondok. Saioa Alkaiza Iruñeako San Fermin zen, Estixu Arozena Lesakakoa eta Eneko Lazkoz Azpilikuetakoa. Hor ere ez ziren atzera gelditu, Lazkozek modu diplomatikoan amaitu arren.

Iruñeako bertso ekitaldia Udalak antolatzen du eta aspaldiko urteetan kokapen aldetik ez du gehiegi zaintzen. Atzokoa ere bazen horren adibide. Takonera partean, balla artean, eta parke osoan eguzkiak betez bete jotzen zuen ia leku bakarrean. Estitxu Arozenak, egoera horren aipamena eginez, eskerrak eman zizkien entzuleei "zoko" hura "txoko goxo" bihurtzen laguntzeagatik.

• 
•