Urnieta, Mutriko eta Urepeleko bertsorik onenak eskainiko dituzte 2010-10-15

Amaia Agirre elkarrizketatuko du Hitzetik Hortzerak

 Hitzetik Hortzerak denboraldi honetako bigarren programa emango du igande honetan, iluntzeko 21etan, ETB1ean. Aste honetan Amaia Agirre izango da programako gonbidatua. Amaia Agirre Urnietako bertso-bazkarian gai-jartzaile lanetan aritu zen, eta saio horri buruz eta gai-jartzaile ofizioaz dauzkan iritziak emango ditu programan. Gainera, Urnietako bertsoaldi onenak entzungai izango dira aste honetan. Honako bertsolari hauek aritu ziren bertan kantari:

 Beñat Gaztelumendi
 Arkaitz Oiartzabal "Xamoa"
 Ainhoa Agirreazaldegi
 Uxue Alberdi

 Dena den, Amaiari bestelako lanik ere jarri diote programan eta, propio eskatuta, Txileko San Jose minazuloan harrapatuta gelditu ziren langileei jarritako bertsoak kantatuko ditu.

 Hitzetik Hortzerako kamarak Mutrikura ere joango dira, Mijoara. Han San Jeronimoak ospatu zituzten eta Sebastian Lizaso eta Iker Zubeldia eraman zituzten kantura bertso-afaritan, Eneritz Azkue gai-jartzaile hartuta. 170 bat entzule bertaratu ziren eta hango bertsoaldi ederrenak eskainiko dituzte aste honetan.

 Joan zen igandean Xalbador Eguna ospatu zen Urepelen. Han Uxue Alberdik Xalbadorri eta Sebastian Lizasok Xanpuni eskainitako bertsoak emango dituzte aste honetan. Zuri-beltzekoan ere Xanpun eta Xalbador izango dira protagonista. Azkenik, Zapping-ean garai bateko "Kate-Motzean" galdetegia oroituko dute.

• 
•