Asteburuan jokatu zen finala 2010-11-29

Julio Sotok irabazi du Bertxoko saria, Askartzan

Askartzako Trebiñu sagardotegian jokatu zen aurtengo Bertxokoko finala, azaroak 26an, ostiralean. Azaroan jokatuta 3 kanporaketetatik sailkatuta, Manex Agirre gaijartzailearen gidaritzapean, Jone Uria algortarra, Julio Soto gorritiarra, Ainhoa Mujika beasaindarra, Asier Azpiroz zubietarra, Ander Solozabal gasteiztarra eta Odei Barroso urruñarra aritu ziren nor baino nor txapel beltza lortu nahian. Aste honetan Bertxoko bertsoak izango dira Bertsoa.com-en, Hitzetik Hortzerako lan taldeak grabatuta.

Bete bete egin zen sagardotegia, eta kanpoko hotzari kontra eginez, giro goxoa sortu zen. Txorizoa, bakailao tortilla, bakailaoa, txuleta eta gazta eta menbrilo goxoak afaldu ostean, kafe eta  kopekin batera hasi zen saio.

Kanta edo doinu ezagun batean agur bikainak kantatu zituzten bertsolariek eta zortziko txiki eta handian ere txukun aritu ziren. Bakarkakoan bi punturi erantzun ostean audio banari bertso bat kantatu behar izan zioten. Audioak egungo notizia ezberdinak ziren, Aita Santuaren esanak, Haitiko egoera, Maialen Lujanbio BEC-en txapeldun bilakatu zenekoa, . . . Ariketa honetan ale politak entzun ahal izan ziren ere.

Amaitzeko hamarreko txiki kartzela egon zen, eta bertan pankarta baten bidez epaitegi baten kokatu zituen Manexek bertsolariak, eta hirunaka hiru puntukoak hiruna kopla kantatuz bukatu zuten lan puntuagarria. Txapela Gorritira joan zen, Julio Sotoren buruan.

• 
•