Bizkaiko Bertsolari Txapelketa 2010-12-14

Aurkeztu da finala

 Larunbat honetan jokatuko da Bizkaiko Bertsolari Txapelketako finala, Barakaldoko BEC aretoan, arratsaldeko 17etatik aurrera. Hiru finalaurreko jokatu ondoren, honako bertsolari hauek sailkatu dira bertara:

 Onintza Enbeita
 Miren Amuriza
 Beñat Ugartetxea
 Etxahun Lekue
 Arkaitz Estiballes
 Jone Uria
 Eneko Abasolo "Abarkas"
 Peio Ormazabal

 Finalistez gain Karmelo Uriarte -Bizkaiko Bertsozale Elkarteko Lehendakaria- aritu da prentsaurrekoan, eta aurtengo txapeldunari txapela jantziko dion Aita Luis Baraiazarra ere bai.

 78 bertsolari hasi ziren txapelketan eskualdeetan, eta horietatik zortzik lortu dute finalerako txartela. Horren atzean dagoen lana azpimarratu du Karmelo Uriartek. Gainera, aurtengo leloa ere aipatu du: "Plazan alkartuko gara". Izan ere, egin beharreko lana ez da txapelketan bukatzen, plazan elkartzen jarraitu beharra dago.

 Zortzi bertsolariek honako ariketa hauek egin beharko dituzte:

 -Binaka, gaia emanda 3na bertso zortziko handian
 -Binaka, gaia emanda 3na bertso zortziko txikian
 -Binaka, gaia emanda 3na bertso hamarreko txikian
 -Bakarka, hasierako puntua emanda 2 bertso zortziko txikian
 -Bakarka, gaia emanda 2na bertso doinu eta neurri librean

 Behin ariketa hauek burututa, bi bertsolari sailkatuko dira buruz burukora. Honako ariketa hauek egin beharko dituzte atal honetara iristen direnek:

 -Binaka, gaia emanda 3na bertso zortziko handian
 -Binaka, gaia emanda 3na bertso "Haizak hi mutil mainontzi" doinuan
 -Kartzelako lana: bakarka, gaia emanda 3na bertso doinu eta neurri librean

 Oraindik ere finalerako sarrerak erosteko aukera badagoela gogoratu du Karmelo Uriartek. Internetez ere erosi daitezke. Gainera, aholku bat ere eman du: Barakaldora joan nahi duenak har dezala metroa eta jaitsi dadila Ansioko geltokian.

 Bertsoa.com-ek zuzenean emango du finala.

• 
•