12 bertsolarik hartuko dute parte 2011-01-17

Ostiral honetan hasiko da Beterriko Txapelketa

 Aurten ere Beterriko Bertsolari Txapelketa antolatu du Larramendi Kultur Bazkunak. Honakoa laugarren edizioa izango da, eta berritasun bat baino gehiago izango ditu. Hala, parte-hartzaileen adin-tartea zabaldu egin dute antolatzaileek, eta 25 eta 30 urte arteko bertsolariak soilik aritu beharrean gazteagoek ere kantatuko dute. Gainera, gipuzkoarrek soilik kantatu beharrean bizkaitarrek ere izango dute aukera.

 12 bertsolarik kantatuko dute aurten ere. Bi kanporaketa jokatuko dituzte:

 URTARRILAREN 21ean, OSTIRALA
 Andoaingo Ontza Elkartean, 20:30etatik aurrera
  Santa Ageda (Agatedeun): Alaia Martin, Miren Amuriza eta Jone Uria
  Santa Lucia (Donelutxi): Uxue Alberdi, Ainhoa Agirreazaldegi eta Onintza Enbeita
  Gaiak Alaitz Sarasolak jarriko ditu

 URTARRILAREN 28an, OSTIRALA
 Asteasuko Aitzo-Ondo Elkartean, 20:30etatik aurrera
  San Esteban (Doneztebe): Jon Martin, Iñigo Izagirre eta Iñaki Gurrutxaga
  San Lorentzo (Donelontxo): Ander Lizarralde, Jokin Labayen eta Unai Muñoa
  Gaiak Jon Zalduak jarriko ditu

 Bertso-afariak izango dira eta 60 eta 70 lagunentzako lekua izango da, hurrenez hurren. Txartelak Larramendi Bazkunaren egoitzetan, liburudendetan eta saioak egingo diren elkarteetan egongo dira salgai, 20 eurotan. Finala otsailaren 12an jokatuko da, Villabonako Behar-zana Elkartean. Amaia Agirre ariko da gaiak jartzen. 100 lagunentzako lekua izango da bertan.

 Txapelketa honetan ezohiko ariketak egiten dituzte bertsolariek. Hala, urtero gogoan hartzeko moduko agurrak prestatu ohi dituzte taldeek. Iazko  edizioan Unai Muñoa, Ander Lizarralde eta Iñaki Apalategik jantzi zuten txapela.

• 
•