Bertso Egunaz ere ariko dira 2011-01-21

Usurbil eta Getariako saioak emango ditu Hitzetik Hortzerak

 Aste honetan ere Hitzetik Hortzera programa izango da ikusgai ETB1en. Igande gauean emango dute, 21etatik aurrera.

 Aste honetan bi bertso-saiok beteko dute tarterik handiena. Usurbilen joan zen igandean egindako saioa emango dute batetik. Honako bertsolari hauek kantatu zuten bertan, Inaxio Usarraldek gaiak jarrita:

 Andoni Egaña
 Onintza Enbeita
 Unai Iturriaga
 Uxue Alberdi

 Getarian, berriz, honako bertsolari hauek jardun ziren kantuan:

 Iñaki Murua
 Patxi Etxeberria
 Imanol Lazkano
 Gregorio Larrañaga "Mañukorta"
 Andoni Egaña

 Jon Zalduak jarri zizkien gaiak.

 Bestalde, datorren astean Bertso Eguna izango denez, egunaren antolaketa lanetan dabilen pertsona bat izango da aste honetako gonbidatua. Hala, Alaitz Rekondo izango da platoan. Nafarroako Txapelketaz ere ariko dira, laster baita hastekoa.

 Ohiko atalak ere izango ditu aste honetako programak. Zuri-beltzekoan Joxe Agirre izango da protagonista. Basarrik hala eskatuta, Iribarri kantatu zizkion bertsoak emango dituzte. Zappingari, berriz, "Sagardoaren graziya" jarri diote izenburu, eta sagardotegietan urteetan egindako grabazioen unerik onenak emango dituzte.

 Datorren astean ez da Hitzetik Hortzerarik izango. Horren ordez, ETBk Bertso Eguneko arratsaldeko ekitaldia emango du larunbatean, gaueko 22etan hasita.

• 
•