"Umorez: Generoa bertsolaritzan" 2011-02-03

Gaur hasiko dira jardunaldiak

 Bertsozale Elkarteko Genero Taldeak "Umorez: Generoa bertsolaritzan" izeneko jardunaldiak antolatu ditu. Genero perspektiba txertatzeko helburuarekin lau hitzaldi antolatu dituzte. Gaur egingo dira lehenengo biak, Subijana Etxean, Villabonan. Lehenik Jone Miren Hernandez ariko da hizlari lanetan, arratsaldeko 18eta. "Emozioen labirintuan: Emakumeen hitza, ahotsa eta bertsolaritza: norabide ezberdin baten bila?" da hitzaldiaren izenburua. Jone Miren Hernandez antropologoa da, eta bertsolaritzaren inguruko ikerketa bat egiten ari da une honetan.

 Ondoren, arratsaldeko 19:30etan, Xabier Odriozolaren txanda izango da. Hitzaldiaren izenburua, berriz, honako hau izango da: "Parekidetasuna eta maskulinitate berriak".

 Bertsoa.com-ek zuzenean eskeiniko ditu bi hitzaldiak.

 Nahi izanez gero hitzaldien ondoren afaltzen gelditzeko aukera ere izango da. Horretarako aurrez egin beharko da erreserba, Bertsozale Elkartera deituta (943 69 41 29) edo idatzita (umorez@bertsozale.com).

 Datorren astean ere hitzaldiak egingo dira, ostegunez:

 18etan Leire Ibarguren: "Nolako umorea egin nahi dugu emakumeok arte eszenikoetan" tesinan oinarritutako hitzaldia
 19:30etan Maialen Lujanbio eta Judith Montero: "Ornitorrinkus lanaren interpretazioa"

• 
•