Bertsozale Elkarteak eta Korrika 17k elkarlanean 2011-03-23

"Euskalakari, koblakari" lehiaketa antolatu dute

 Laster iritsiko da 17. Korrika Euskal Herriko errepideetara. Giroa berotze aldera, Korrika 17k eta Bertsozale Elkarteak "Euskalakari, koblakari" deritzon lehiaketa antolatu dute elkarlanean. AEKko euskaltegietako ikasleei eta praktika egitasmoetako lagunei zuzendutako lehiaketa da. Parte hartu nahi dutenek euskalakari baten eguna kontatu beharko dute sei koplatan, "ama begira zazu" edo "ikusi nuenean" doinuak erabilita. Sortak taldeka idatzi beharko dira.

 Lanak apirilaren 1a baino lehen bidali beharko dira honako helbide honetara: prentsa@aek.org. Berez koplak idatziz bidaltzea aski da, baina, nahi izanez gero, kantatu eta bideoz grabatuta ere bidali daitezke. Bideoz bidaltzen diren sortek puntu gehigarri bat izango dute gainera.

 Talde irabazleak sagardotegi batean bazkari bat lortuko du bi bertsolarirekin.

• 
•