Nafarroako Bertso Eskolen Eguna 2011-06-07

Giro ona izan zen Larraintzarren

 Joan zen larunbatean Nafarroako Bertso Eskolen Eguna ospatu zuten Larraintzarren. 50 bat haur eta gaztetxo elkartu ziren bertan, eta giro onean ospatu zuten eguna. Hala, arratsaldean, hainbat jolas egin zituzten, eta dantzaldia ere egin zuten Oskar Estanga bertsolari eta musikariak gidatuta.

 Goizean, berriz, Nafarroako Eskolarteko Bertsolari Txapelketa jokatu zen 14 urtera artekoen kategorian. Bertan Maddalen Lopez lesakarrak jantzi zuen txapela bigarrenez. Bigarren postua, berriz, Doneztebeko Beatriz Maritorenak lortu zuen. Biak izango dira Nafarroaren ordezkari ekainaren 18an Agurainen egingo den Euskal Herriko Txapelketan.

 Ospakizunak ez ziren larunbatean bukatu ordea. Aurten ere Nafarroako Bertso Eskoletan ari diren helduek beren eguna izango dute: Bota Eguna. Aurtengoa bigarren edizioa izango da, eta Lekunberrin eta Astizen ospatuko da larunbat honetan. Egun osoa betetzeko adinako egitaraua prestatu dute gainera: mendi txangoa, bertso poteoa, musika emanaldia, performancea...

• 
•