Elzondon jokatu zen finala 2008-12-02

Jon Elizetxek irabazi du III. Mariano Izeta Sariketa

Jon Elizetxek irabazi du Mariano Izeta sariketaren hirugarren edizioa. Gartzaingo bertsolaria izan zen nagusi larunbatean Elizondon jokatu zen finalean. 80 bertsozale inguru elkartu ziren Eliza ondoko aretoan eta saio politarekin gozatzeko aukera izan zuten. Mariano Izeta zenaren alabak jantzi zion txapela bertsolari gazteari.
Elizetxe oso seguru aritu zen ofizioka eta kartzelako ariketetan borobildu zuen bere saioa. Osotara, 188 puntu lortu zituen. Bere atzetik, orain dela bi urte Mariano Izeta sariketa irabazitako Oier Lakuntza sailkatu zen, 183 punturekin. Jarraian, finalean parte hartu zuten lau bertsolariek: Diego Riaño (174 puntu), Alazne Untxalo (170,5 puntu), Aritz Saragueta (166,5 puntu) eta Ekaitz Astiz (160,5 puntu).
Nafarroako Bertsozale Elkarteak eta Baztandarren Biltzarrak antolatuta, Nafarroako bertsolari gazteei zuzenduta da bi urtetan behin egiten den Mariano Izeta sariketa. Aurten 16 bertsolarik hartu dute parte sariketan eta finala jokatu aurretik bi kanporaketa egin ziren, Iruñean eta Arbizun.
Finala www.bertsoplaza.tv webgunean ikusgai

• 
•