Aitor Sarriegirekin hitz egingo dute 2011-12-23

Gipuzkoako finaleko une onenak eskainiko ditu Hitzetik Hortzerak

 Joan zen igandean Donostiako Illunbe zezen-plazan jokatu zen Gipuzkoako Bertsolari Txapelketako finala. Aitor Sarriegi beasaindarrak lortu zuen txapela. Bere atzetik gelditu ziren, hurrenez hurren, Beñat Gaztelumendi, Alaia Martin, Iñaki Apalategi, Agin Rezola, Jexux Mari Irazu, Jon Martin eta Unai Agirre. Finala ETB1ean eman zuten igande gauean bertan, eta aste honetako Hitzetik Hortzerak ere tarte zabala eskainiko dio. Hala, telebistan ikusi ez ziren irudiak emateaz gain, txapelduna ere elkarrizketatuko dute Mikel Mendizabalekin batera. Goierriko Bertso Eskolen sortzaileetako bat da Mikel Mendizabal, eta berari eskaini zion txapela Aitor Sarriegik. Hala, Ordiziako Barrena Jauregian elkarrizketatuko ditu biak Jon Artanok, bertan hasi baitzen bertsotan egungo txapelduna, artean mutikoa zelarik. Elkarrekin egindako bidea eta igandean izandako sentsazioak izango dituzte hizketagai. Horrez gain Igor Eguren Ordiziako alkatea ere elkarrizketatuko dute. Aitor Sarriegiren bertso-laguna da, eta berarekin osatuko dute txapeldunaren soslaia.

 Hitzetik Hortzerak emisio ordua eta eguna aldatuko ditu. Hala, aurrerantzean larunbat arratsaldeetan emango dute, 15etan.

• 
•