Jesus Egiguren izango da aste honetako gonbidatua 2012-02-03

Bertso Eguneko afalosteko saioa eta Tolosako jaialdia Hitzetik Hortzeran

 Bertso Eguna ospatu zen joan zen larunbatean, eta pisu handia hartuko du aste honetako Hitzetik Hortzera programan. Hala, afalostean egindako saioetako aukeraketa bat eskainiko dute.

 Bestalde, urtarrilaren 21ean Tolosako Leidor Antzokian Txolarre irratiak antolatutako saioak ere bere lekua izango du. Leporaino bete zen aretoa honako bertsolari hauek entzuteko: Maialen Lujanbio, Aitor Sarriegi, Andoni Egaña, Jon Maia, Jexux Mari Irazu eta Amets Arzallus. Amaia Agirre aritu zen gai-jartzaile lanetan. Tartean, Goierriko bertso-eskolako gaztetxoak atera ziren oholtzara bertsolariak zirikatzera.

 Aste honetan PSE-EEko lehendakari Jesus Egiguren gonbidatu dute platora. Umetatik da bertsozalea, eta Bilintx protagoniosta duen nobela bat idatzia duela kontatuko du, besteak beste.

 Azkenik, ohiko atalak ere izango ditu programak. Zuri-beltzekoan Basarrik naufrago bati botatako bertsoak eskainiko dituzte. 1968an bota zituen bertso horiek, Piensos Onenak antolatutako sariketa ospetsuan.

 Zappingean, berriz, Mitxelena eta Mañukorta izango dira protagonosta. 1987an pisuzko ofizioa osatu zuten Bertsolari Egunean.

 Larunbat bazkalostean ikusi ahal izango da programa ETB1en. Nahi izanez gero aurretik ere ikusgai egongo da hemen.

• 
•