Uxue Alberdi gonbidatuko dute platora 2012-03-16

Usurbil eta Mallabiko bertso-afariak eskainiko ditu Hitzetik Hortzerak

 Larunbat bazkalostean, Gaur Egun albistegiaren ondoren, Hitzetik Hortzera programa izango da ikusgai ETB1en. Aste honetan bi bertso-afarik beteko dute programaren zatirik handiena. Alde batetik, martxoaren 8a ospatzeko Usurbilgo Artzabal jatetxean egindako bertso-afaria emango dute. Onintza Enbeita, Ainhoa Agirreazaldegi eta Uxue Alberdi aritu ziren bertan kantuan, festa giroan. Saio horretaz eta beste hainbat konturi buruz hitz egiteko Uxue Alberdi gonbidatuko dute platora.

 Programan eskainiko duten bigarren saioa hurrengo egunean egin zen Mallabiko Izar Gorri elkartean. Iker Zubeldia eta Iban Urdangarin joan ziren bertara, eta saio umoretsua osatu zuten Beñat Ugartetxea gai-emaile zutela.

 Horrez gain, Arabako Koadrila Arteko Bertso Txapelketako finalerdietako unerik onenak ere emango ditu Hitzetik Hortzerak.

 Bukatzeko, ohiko atalak ere izango ditu programak. Zuri-beltzekoan Lazkao Txiki izango da protagonista. Zappingerako aukeratu duten pieza, berriz, Zeberio anaiek Ataunen 2002an egindako saio bat da. Nikolas puntu jartzen aritu zen eta Xabier erantzuten.

• 
•