Millan Telleria gonbidatuko dute platora 2012-03-23

Zestoa, Mallabia eta Barañaingo saioak eskainiko ditu Hitzetik Hortzerak

 Aste honetan ere Hitzetik Hortzera programa eskainiko du ETB1ek. Larunbatean izango da, eguerdiko Gaur Egun albistegiaren ondoren.

 Aste honetan hiru bertso-saio izango dira programaren ardatz. Batetik, joan zen ostiralean Zestoako gaztetxean hirugarrenez antolatu zuten bertsolari gazteen saioko irudiak emango ditu Hitzetik Hortzerak. Julio Soto, Aitzol Barandiaran, Iban Urdangarin, Alaia Martin, Agin Rezola eta Aitor Salegi aritu ziren kantuan. Aimar Etxeberria jardun zen kantuan. Zestoako Gazte Asanbladak eta Erralla bertso-eskolak antolatu zuten saioa, eta giro ederra izan zen gaztetxean.

 Martxoaren 9an Mallabiko Izar Gorri elkartean Iban Urdangarinek eta Iker Zubeldiak egindako bertso-afariko unerik distiratsuenak ere eskainiko ditu aste honetako programak. Azkenean, egun hartan gai-jartzaile lanetan zebilen Beñat Ugartetxea ere kantuan jartzea lortu zuten.

 Azkenik Bardoak ekimenaren barruan Barañainen egindako saioan ere izan ziren Hitzetik Hortzerako kamerak, eta saio hartako aukeraketa bat ere emango dute aste honetako programan.

 Aste honetan Millan Telleria bertsolari ezaguna gonbidatuko dute platora. Aurretik sekula erakutsi gabeko irudiak erakutsiko ditu platoan albizturtarrak: 1985ean Tolosan egindako Trikitilari Egunekoak. Anjel Mari Peñagarikanorekin batera Santa Maria elizan kantatu zuen Millan Telleriak, artean bigoterik gabe.

 Bukatzeko, "Zuri-beltzeko Auspoa" atalean, Kandido Uranga aktoreak Franzisko Apalategiren "Baso-mutillak" liburuko pasarte bat irakurri eta komentatuko du.

• 
•