Jaialdia Mallabian 2012-05-15

Herrirako aguazil bila

Nabari da mallabiarrek ez dutela hutsik egiten urteroko zitara. Igandean paseorako giro ederra egon arren, jende asko gerturatu zen pilotalekura bertso-saioa entzutera.

Beñat Ugartetxea, Iker Zubeldia, Amets Arzallus, Maialen Lujanbio, Andoni Egaña eta Unai Iturriaga igo ziren oholtzara, Asier Ibaibarriaga gai-jartzailearekin batera. Oholtzatik urruti samar eseri zen jendea baina horrek ez zuen hoztu giroa, gogotsu egin zuten txalo bertsozaleek.

Saioaren zati handiena ofizioka osatu zuten, gehienak umoretik: Ugartetxea eta Egaña langile eta nagusiaren lekuan, Lujanbio eta Egaña inoiz ohe bakarrean lo egin gabeko bikote moduan edota Ugartetxea eta Zubeldia kaletartutako bi baserriko semeren lekuan.

Baina saioari pisu pixkat eman nahi izan zion Asier Ibaigarriagak eta hiru bakarkako lan jarri zituen; aipatzekoa Iturriagak bonbardaketen 75.urteurrenari abestutako bertsoak.

Bertsolari guztiak batera ere aritu ziren bertsotan: Mallabiako hitzen esanahia asmatu nahian lehendabizi eta herrirako aguazil berriaren bila gero.

Ia bi orduko saio ederra osatu zuten denen artean, eta mallabiarrak hurrengo urteko zitaren zain daude honezkero.