Baztan-Bidasoako Bertsopaper Lehiaketa 2012-06-12

Joan zen ostiralean egin zen sari-banaketa

 Baztan-Bidasoako Bertsopaper Lehiaketako sari-banaketa ekitaldia egin zen joan zen ostiralean Berako Kultur Etxean. Aurten 25. ediziora iritsi da sariketa, eta parte-hartze handia izan da, 17 lan jaso baitituzte. 12 urte artekoetan Ane Telletxea lesakarrak lortu du lehenengo saria, "Sanferminak" izeneko sortari esker. Bigarren Ane Fagoaga beratarra geratu da, "Lagun Kuttuna" izeneko sailarekin.

 12 eta 15 urte bitartekoetan Azkainera joan da lehenengo saria, Aitor Servier izan baita irabazle "Udaberriro" sortarekin. Bigarren Beatriz Maritorena doneztebearra geratu da "Krisia" izeneko lanarekin.

 16 eta 17 urte bitartekoetan Mikel Telletxearen "Herri Urrats" sorta gustatu zaio gehien epaimahaiari. Bigarren Gorka Sanjurjo geratu da "Nire laguna?" sailarekin.

 Azkenik, 18 urtetik gorakoetan Julen Zelaieta beratarrak jantzi du txapela "151 km edo egun handi baten kronika" lanarengatik. Bigarren Iban Garro lesakarra geratu da "Errefuxiatuaren aitortza" izeneko sortarekin.

 Sariak jaso ondoren saritu bakoitzak bere sortak kantatu zituen.

• 
•