Aurtengoa laugarren edizioa izango da 2012-06-14

Bertso Hautatu lehiaketa egingo da Donostian

 Aurten ere Bertso Hautatuen Lehiaketa antolatu dute Donostiako Bagera eta Txirain Elkarteek. Aurtengoa laugarren edizioa izango da. Lehiaketan parte hartzeko bertsolariren batek lehendik egina duen bertso-pieza bat aukeratu beharko dute partehartzaileek. Pieza bat-batekoa nahiz bertso jarria izan daiteke, baina gehienez hiru bertsokoa izan beharko du. Gainera, lehiakide bakoitzak ezingo du pieza bat baino gehiago aurkeztu. Aukeratutako pieza ekainaren 20a baino lehen bidali beharko da Txirain elkartera (txirain@euskalnet.net) edo Bagera elkartera (bagera@bagera.net). Posta arruntez bidali nahi izanez gero honako hau da helbidea:

  Bagera Elkartea
  Katalina Elizegi 36, behea
  20009 Donostia

 Aukeratutako piezarekin batera piezaren izena, bertso egilearen izena, noiz edo non sortua edo argitaratua den eta bertsoa aurkezten duenaren izena eta telefonoa bidali beharko dira.

 Jasotako pieza guztiak ekainaren 22an Txirain Elkartean egingo den afarian kantatuko dira (partehartzaile bakoitzak kantatu beharko du berea), eta han daudenek egingo dituzte epaile lanak. Partehartzaileek dohako sarrera izango dute, eta gainerakoek hamabost euro ordaindu beharko dituzte. Afaritarako txartelak hartzeko Bagera Elkartera deitu beharko da: 943 46 71 81.

 Sariei dagokienez, lehenengo hiru sailkatuek bi lagunentzako afari bana irabaziko dute. Gainerako partehartzaileen artean bi lagunentzako afari bat zozketatuko da. Horrez gain, afarian Irutxuloko Hitzaren materiala zozketatuko da.

• 
•