Bertso-agenda 2012-08-16

Bederatzi saio gaur

 Herriko festak dira Euskal Herriko inguru gehienetan, eta, ohiturari eutsiz, bertso-saio ugari izango dira bazterretan. Gaurko bederatzi daude iragarrita.

 Donamarian, festen egitarauaren barruan, bertso-pilota dago iragarrita. Julio Soto eta Julen Zelaieta jardungo dira botilero lanetan.

 Jai giroan dabiltza Mallabian ere. Bazkalondoan saioa egingo dute Beñat Ugartetxea eta Gregorio Larrañaga "Mañukorta"-rekin.

 Beñat Ugartetxea Ean ere ariko da gaur, Natxituan, eguerdiko 13etan, Uxue Alberdirekin batera.

 Zugarramurdiko festetan bertso-poteoa egingo dute arratsaldeko 17etan Maialen Lujanbio eta Andoni Egañarekin.

 Ondarroan herri-kirolen erakustaldia izango da udaletxe ondoko frontoian arratsaldeko 18etan. Ikusten dutenari kantari jardungo dira Arkaitz Estiballes, Jon Maia eta Iratxe Ibarra.

 Arantzan, urtero bezala festetako bertso-saioa egingo dute gaur iluntzeko 19etan. Aitor Sarriegi, Aitor Mendiluze, Ane Labaka eta Beñat Gaztelumendi dira bertan kantatzekoak.

 Orion "Bertsolharitza" emanaldi berezia izango da ikusgai herriko plazan iluntzeko 19:30etan.

 Zerainen, berriz, herri afaria ospatuko dute iluntzeko 20:30etan. Afalostea girotzen Sebastian Lizaso eta Iker Zubeldia jardungo dira.

 Bukatzeko, Donostiako Piraten Aste Nagusian bertso-saio musikatua egingo dute Trinitate Plazan gaueko 23:30ak aldera. Jokin Labayen, Arkaitz Oiartzabal "Xamoa", Beñat Gaztelumendi eta Alaia Martin ariko dira bertsotan.

• 
•