Mutrikuko Bertso-Eskolak antolatuta 2012-10-31

Martxan da Okelar Anaiak bertsopaper lehiaketa

 Mutrikuko Bertso-Eskolak 28. aldiz antolatu du Okelar Anaiak Bertsopaper lehiaketa. Lanak bidaltzeko epea zabalik dago jada, eta azaroaren 30ean itxiko da. Antolatzaileek bi kategoria bereizi dituzte.

 16 urtera artekoek gutxienez 3 bertso edo 6 koplako sortak osatu beharko dituzte. Maila honetako irabazleak txapela, 60 euro eta opari bat jasoko ditu. Herritarrak ere ez dira esku-hutsik geratuko. Hala, mutrikuar onenak 30 euro eta oparia irabaziko ditu, eta bigarrenak oparia.

 17 urtetik gorakoak helduen kategorian lehiatuko dira eta gutxienez 6 bertsoko lanak bidali beharko dituzte. Sariei dagokienez, irabazleak txapela eta 300 euro eramango ditu, eta bigarrenak 150 euro. Mutrikuar onenak, berriz, bi lagunentzako afaria irabaziko du San Juan jatetxean.

 Sari-banaketa abenduaren 22an egingo da, Mutrikuko Santo Tomas feriaren barruan.

 Bertso-sorta batek ez du sari bat baino gehiago jasoko, eta, epaimahaiak hala ebatziz gero, sariren bat eman gabe utzi daiteke. Baldintzei dagokienez, bertsoek jatorrizkoak, argitaratu gabeak eta inon saritu gabekoak izan beharko dute. Lanak ezizenez sinatu beharko dira, eta bertso-sortarekin batera ezizena agerian duen gutunazalaren barruan bidaliko dira egilearen izenordea, izena, helbidea, adina eta telefonoa. Erabilitako doinua eta bertso bakoitzaren ordena zenbakia ere zehaztu egin beharko dira. Bidalketa posta elektronikoz egin nahi izanez gero, "doc" (Word) edo "odt" (Writer) formatuko dokumentuak izan beharko dute. Hala eginez gero bi artxibo bidali beharko dira: batean bertso-sorta bera ezizenez sinatuta, eta bestean datu pertsonalak: ezizena, izena, helbidea, adina eta telefonoa. Hau da lanak bidaltzeko posta elektronikoaren helbidea: mutrikube@gmail.com

 Posta arruntez bidali nahi izanez gero, honako hau da helbidea:

  OKELAR anaiak bertsopaper lehiaketa
  Mutrikuko Bertso Eskola
  Luardo Etxea (Barrenkalea, z/g)
  20830 Mutriku
  Gipuzkoa

 Lanen jabetza antolatzaileen esku geratuko da eta, hala nahi izanez gero, denak argitaratzeko eskubide osoa izango dute. 

• 
•