Herrirak antolatuta 2013-02-25

Presoen eskubideen alde

Orain esanda gezurra badirudi ere giro ederra zen hilaren 17an, kanpoan egoteko giro ederra. Bertsoak barruan ziren ordea eta jaialdi erakargarriegia zen kanpoan geratzeko. 400 lagun inguru elkartu ziren Villabonako Olaederra kiroldegian, bertsoak entzun eta bide batez Herrira mugimenduari eta bere aldarrikapenei babesa emateko.

Julio Soto, Andoni Egaña, Maialen Lujanbio, Amaia Agirre, Amets Arzallus eta Alaia Martinek osatu zuten bertsotarako seikotea, Jon Zaldua gidari zutela. Ia bi orduko saioa egin zuten, ederra.

Ederra Andoni Egaña eta Maialen Lujanbiok egindako lana. Maialen presoa bisitatzera doa Andoni bere laguna. Hiru egoeratan jarri zuen bikotea Jon Zalduak: Andoni bisitara abiatu aurretik, Andonik bidean istripua izanda eta Andoni bisitara iritsi ez dela.

Julio Sotok eta Alaia Martinek bertsoaldi polita osatu zuten bikote eta guraso paperean; euren seme-alabek gaixotasun genetiko bat garatzeko arriskua dutela, bigarren haurra izan ala ez izan erabaki nahian.

Jarraian Maialen Lujanbiok atzekoei abestu zien. Aspaldian Vaticanori buruz asko hitz egin da eta Maialen Aita Santu berriaren bila dabilela atzeko bostak aurkeztu zaizkio hautagai.

Amaia Agirre eta Amets Arzallusek bakarka abestu zuten. Amaiak bere etxetik kaleratzear dagoenaren ahotik eta Ametsek gaur egungo hedabideetan agertzen diren albisteei buruz.