Gipuzkoako Bertso Eskolen Eguna 2013-04-29

200 ikasle baino gehiago Pasai Donibanen

 Atzo ospatu zen Gipuzkoako Bertso Eskolen Eguna Pasai Donibanen. Denera 200 haur baino gehiago elkartu ziren, eta egun ederra pasa zuten kamiseta arrosak jantzita. Goizean txalupan Pasai San Pedrotik Pasai Donibanera igaro ondoren aurreskua dantzatu eta bertso bat kantatu zuten. Goizean zehar Lur Korta ipuin kontalariak itsasoari buruzko bi ipuin kateatu kontatu zizkien haurrei, eta Paul Beitia, Beñat Azaldegi eta Jon Gurrutxagak bertso-saio musikatua egin zuten azken asteotan Gipuzkoako bertso-eskoletan osatutako bertsoekin.

 Bazkalostean piraten ginkana egin zuten herrian eta haurrak mapa bati jarraituz proba batzuk egiten aritu ziren kalez kale.

 Atzokoan Pasaiako Udala eta bertako bertso-eskola izan zituen bidelagun Gipuzkoako Bertsozale Elkarteak. Aurreko urteetan Zumaian, Villabonan, Oiartzunen, Oñatin, Usurbilen, Azkoitian, Eibarren eta Legazpin egin dira ospakizunak.

 Aurten bi Bertso-Eskolen Egun

 Aurtengoan 14 urtetik beherako ikasleek eta hortik gorakoek bereizita ospatu dituzte Bertso-Eskolen Egunak, denek gozatzeko aukera izan zezaten. 14 urtetik gorakoak otsailaren 16an eta 17an Segurako aterpetxean elkartu ziren. Bertso-Eskolen Egunak bi helburu dauzka. Batetik, ikasleak mugimenduaren parte senti daitezen lortu nahi da, ez soilik beren herriko bertso-eskolako parte. Bestetik, herri desberdinetako ikasleen arteko harremanak sendotu nahi dira.

• 
•